Ispetur raional stödafüch

I stödafüch é arjigná 24 ores sön 24, 365 dis al ann, por daidé te caji de medefüch, de inzidënc y de prighi a gauja de catastrofes. Por che döt funzionëies, ól ester infrastrotöres y mascins, mo suradöt les porsones che cun na bona formaziun y n gran idealism se mët a desposiziun te n grup por ti porté aiüt a süa comunité y a döta la jënt.

Campionëssa dl monn de freestyle

Anfat tan lunc che i vá, le ladin é tres cun me te mi cör. Al él le lingaz te chël che i pënsi y cun chël che i me sënti tres indô daciasa. Bele da picera âi capí che chësc lingaz che ma püc capësc é valch de prezius. Ciamó sëgn m’acompagnëiel dlunch olache i vá y me dá segurëza y me fej sté saurí ince sce i sun dalunc da mia tera.

Presidënt Cassa Raiffeisen Val Badia

Le stromënt dla cumpedada – detlararaziun de portignënza é valch dër de important, spezialmënter por les mendranzes. Sce an é bogn da tigní adöm y da partezipé, spo án la poscibilité da avëi ince deplü pëis politch. Deplü jënt che tol pert y deplü forza che i un! Chësta é ince na forma de democrazia, che ne á nia ma vantaji mo ince dovëis, porchël arati che al sides bun y dërt da tó pert ala cumpedada.

Presidënt Maratona dles Dolomites

Degügn mürs, mo na lerch viüda emotivamënter, geograficamënter, economicamënter. Se detlaré ladins é n’aziun d’amur.

Primar anestesia y terapia intensiva ospedal Bornech

Por na picia mendranza sciöche la nosta él dër important da tó pert ala cumpedada dla popolaziun. Cun na gran partezipaziun ciafa i ladins deplü posć tl setur publich y insciö ince te chël sanitar, che á na importanza fondamentala por i debojëgns de nosta jënt che gnará tl dagní tres maius no ma sön le post, mo ince tles ciases de palsa y ti ospedai.

Mëmbra consëi aministratif Vitalpin

Nos ladins un raisc dër sotes y stersces che nes pormët da crësce culturalmënter te deplü direziuns. La particolarité de nosta comunité y de nosc teritore é n valur che vëgn aprijé y chirí tres indô danü da jënt da dlunch fora por le monn y che röia adalerch te nostes valades.

Artist y presidënt dl’UNIKA

La cultura ladina ie de gran mpurtanza per duc. Leprò toca nce l ziplé tl lën che à na gran tradizion tla valedes ladines, sëuradut te Gherdëina. Coche cumëmber de “Unika” uei purté inant chësc mestier, nia me fermé y jì danora cun ideies nueves.

La richëza dla persona ie la cultura, suvënz zapeda ju dala richëza materiela. Perchël iel mpurtant renfurzé la cultura ladina, fajan pea pra la cumpededa dla jënt y dajan ju si apartenënza linguistica.

Diretur Alta Badia Brand

Nosc lingaz y nosta cultura é valch che i viun cun le cör, mo ince n patrimone de gran valüta a livel turistich, che pormët da se desfaranzié da düc i atri raiuns.

Ambolt de Urtijëi

Nëus ladins on la fertuna de vester chersciui su te na realtà defin particulera, nraviseda tl passà y proieteda tl daunì. Uniun de nëus possa y dëssa dé n cuntribut a mantenì y dé inant chësta arpejon culturela tan speziela. Per pudëi l fé coche l toca messons tenì adum ajache mé na cumenanza sterscia à la forza de se lascé audì.

Vizeombolta y assessuria Comun de Mareo

Iö me detlarëii ladina por ti garantí n svilup a nosc sistem scolastich, y por che l’impëgn politich de nostes aministraziuns ais deplü reconescimënt.

Degan dla Val Badia

Cun döt le respet por la liberté dla porsona, unse ince dovëis che reverda la comunité y sozieté. An dij ince “deboriada vára plü saurí” y “un por düc y düc por un”. La solidarieté y la fraternité dess ester la merscia de nos cristians. Cis por nos, sc’i orun ester inant Ladins, él de dovëi ciaré de nüsc dërc culturai, religiusc y ambientai. Ince cun chësta cumpedada provinziala podunse i fá valëi y i adoré a nosc sorvisc. Porchel feji iö para.

Balarina profesciunista

L me sà bel a ti dé valor a nosta ravises acioche les posse se svilupé y deventé na richëza per nëus, che pudon pona partì cun l mond.

Diretëur Istitut Ladin Micurà de Rü

Ti ultims ani vën l ladin adurvà y scrit nce te ucajions ulache l ne univa nia drë adurvà! Propi per chël vala de cialé che trueps se detlarëie ladins: da chësc depënd posć de lëur, sustëni economich, servijes!

Poet, nseniant y scritëur de tesć per trasmiscions televisives y per l radio

Coche nseniant y scritëur ladin ie la rujeneda ladina mi mesun de comunicazion da unidì. Me sënte fertunà a pudëi adurvé mi rujeneda dl’oma ntan mi lëur y per mi ativiteies cultureles. Na rujeneda a chëla che me sënte lià y che me fej sentì liede y particuler danter duta l’autra rujenedes dl mond. Vester ladin y mpo avëi l ardimënt de cuché sëura l cunfin.

Vizepresidënt raional LVH

I artejans ladins é conesciüs lunc y lerch por süa tradiziun, esperiënza y por so savëi ti mistiers dl artejanat. Ince por i artejans se müda tresfora les sfidades y tres danü él da ciafé trus nüs por podëi respogne ales esigënzes di cliënc.

Ex campionëssa dl mond de schi alpin

Me sënte ladina ajache mi rujeneda dl’oma ie gherdëina y me sënte da cësa te mi valeda y mi montes.

Ex Assessëur provinziel

La cumpededa dla grupes linguistiches ie particularmënter mpurtanta per i ladins te Südtirol: per si dërc y per la ressorses da spartì su aldò dl proporz.

Ombolt Comun de Badia

Düc i ladins dess podëi se detlaré ladins! La cumpedada dla jënt é n’ocajiun importanta por podëi dí ch’i nes sintiun ladins! I ne podun nia perde l’ocajiun da detlaré nosta portignënza etnica y linguistica. Chësc ince por mantigní inant i dërc da lauré, da abité y da ciafé i finanziamënc che nes vëgn reconesciüs dal Statut d’Autonomia!

Ambolt de S. Cristina

I ladins ie na mendranza cun de gran valores che ie unii mandei inant te truepa generazions. L nseniamënt tla scoles tla valedes ladines y la truepa lies cultureles te nosc raions dà n gran cuntribut per mandé inant chisc valores. L ie de gran mpurtanza nce de se detlaré ladins, tenian adum per renfurzé mo deplù nosta ravises.

Presidënta dl Schi Club Gherdëina

Feje pea y sustënie la Cumpedada Ladina ajache per nëus ladins ie la rujeneda de gran mpurtanza y acioche l ladin reste for na rujeneda da uni di, danter cumpanies, tla lies, sun streda, te ustaria, ma dantaldut tla families da pitli insù.

Mé a chësta maniera iesen boni de mantenì na rujeneda viva nce te duc i ciamps dal sport ala politica y cultura.

Presidënt dla Lia dl Turism de Urtijëi

L ie de gran mpurtanza fé pea pra la Cumpedada 2022 per stravardé nosc dërc de mendranza ladina y se tenì i dërc arjonc cun gran mpëni te duc chisc ani.